Konsèy Siperyè Pouvwa Jidisyè a (CSPJ) raple jij Al Duniel Dimanche ki lage plizyè manda rale mennen vini kont plizyè ansyen kad nan Leta a manda l fini depi 29 janvye 2024 pase a. Nan yon korespondans ki pote siyati Mesye Jean Joseph Lebrun, ki rive jwenn jij la jedi 22 fevriye ki fenk pase a, Konsèy la di jij la li p ap ka kontinye mennen enstriksyon ankò.
Aprè l fin lage plizyè manda rale mennen vini kont yon trantèn ansyen kad Leta, ansyen prezidan Michel Joseph Martelly ak ansyen Jocelerme Privert, ak kèk ansyen minis pou koripsyon, Al Duniel Dimanche p ap kapab kontinye mennen dosye sa yo. Daprè CSPJ manda jij la bout depi 29 janvye 2024 pase a. Nan sans sa CSPJ enfòme jij enstriksyon k ap travay sou dosye materyèl nan CNE desizyon sa ki pran nan dat jedi 22 fevriye 2024 la pou kanpe l sou tout aksyon li ta vle angaje nan Kad dosye ankèt.
Menm jou a, Mesye Jean-Robert Constant ki se Sekretè teknik CSPJ ekri direktè Lapolis nasyonal la pou l enfòme l jij Dimanche pa ka mennen ankenn aksyon enstriksyon. Yon lòt kote, Dwayen tribinal Premye enstans Pòtoprens la, Bernard Saint-Vil ekri grefye an chèf la pou enfòme l sou desizyon sa epi mande l pou l redistribiye dosye ki te nan men jij Dimanche yo.
Daprè korespondans CSPJ voye bay jij la, li p ap kapab ekzèse ankenn travay enstriksyon jouk manda l renouvle.
Carl Henry Florant
