SOS jounalis felisite desizyon premye minis Garry Conille ak minis jistis ak sekirite piblik Carlos Hercule ki deside finalman mete sou kote komisè gouvènman tribinal premye enstans Okay la Mèt Ronald Richmond.
SOS jounalis raple yo te ensite anpil pou mande gouvènman pase a pou te pran desizyon sa a,pou yon rezon oubyen lòt ,yo te refize.
SOS jounalis lanse apèl bay otorite politik jidisyè administratif ak polisyè yo fè tout sa yo kapab pou dosye asasina jounalis Garry Tesse ak anpil lòt jounalis ki mouri nan menm sikonstans sa rantre nan lis dosye priyorite gouvènman an.
Nan sans sa SOS jounalis mande otorite pou yo bay Jij enstriksyon Mèt Jean Michelet Seide mwayen lojistik ak sekirite pou kontinye travay sou dosye a, pou rive idantifye epi trennen devan tribinal prezime asasen jounalis la.
SOS jounalis raple komisè Richemond te fabrike 2 fo òdonans avèk fo siyati jij enstriksyon Robert Jourdain poul te ka libere kèk moun ki te nan prizon nan dosye a pami yo Wilkens Thirogène ki se yon pwòch li yo estime ki se «otè materyèl» krim nan .
Jij jourdain te pote plent kont Ronald Richemond pou fo dokiman nan ministè jistis. Plent la pat jwenn okenn swit.
Malgre yap eksprime kè kontan yo SOS jounalis pa vle rete la,yo mande otorite yo pran desizyon pou entèdi ansyen chèf pakè Okay la kite peyi a poul pa kouri pou lajistis.
Pou fini SOS jounalis remèsye Ofis proteksyon sitwayen ki te jwe gwo wòl pou dosye a te franchi etap sa a .
