Gouvènman ayisyen an pibliye vandredi 7 oktòb 2022 sa a nan kolòn jounal “Le Moniteur”, rezolisyon ki pran nan Konsèy Minis pou mande entèvansyon fòs militè etranje an Ayiti.
Nan rezolisyon sa a, Konsèy Minis lan bay chèf gouvènman an manda pou mande entèvansyon fòs militè etranje nan peyi a.Pou sipòte desizyon sila, Konsèy Minis lan fè konnen yo devaste pa risk ki genyen nan yon gwo kriz imanitè kap frape peyi a sitou ak retounen toudenkou kolera, ajoute ak deteryorasyon akselere sitiyasyon sekirite a sou tout teritwa nasyonal la.
Daprè rezolisyon sa a, Premye Minis Ariel Henry gen manda poul al chèche ak jwenn nan men patnè entènasyonal Ayiti yo “sipò efikas atravè deplwaman imedya yon fòs lame espesyalize an kantite, pou vin mete fren sou tout teritwa a ak kriz imanitè ke ensekirite, aksyon kriminèl gang ak zam yo kreye a.
Anplis de sa, daprè rezolisyon an, klima sekirite a dwe pèmèt gouvènman an konbat kolera, pou rekòmanse distribisyon gaz ak dlo potab nan tout peyi a, pèmèt lopital fonksyone, epi pou aktivite ekonomik yo ka rekòmanse men tou sa pral ede lekòl yo relouvri pòt yo.
