Soti 31 me pou rive 7 jen 2023, senk (5) moun mouri nan prizon sivil Tigwav la daprè Me Valenbrun Jasmin, jij ranplasan na tribinal lapè nan jiridiksyon sa.
“Move kondisyon detansyon, mank swen medikal pou prizonye ki malad yo ak yon rejim alimantè ki pa ekilibre se tout faktè sa yo ki lakòz lanmò prizonye sa yo,” daprè Jij Valenbrun Jasmin, ki te fè konsta legal yo avanl te bay lòd pou leve kadav yo nan prizon an al mete nan yon mòg nan minisipalite a.
Viktim yo pat gen chans parèt devan jij natirèl yo avan yo mouri.
An Ayiti prizon yo tounen yon veritab lanfè pou prizonye yo: grangou, move kondisyon laswenyay mete avèk fènomèn ensekirite a ki lakoz anpil prezime kriminèl lapolis al ranpli espas kaseral yo.
