«National Océanic and Atmospheric Administration/ NOAA » kòm tout ane mete lis non siklòn yo deyò

Jan sa a toujou ye chak lane, lis ki gen non diferan siklòn ki ka fomè yo pandan sezon siklonik la soti premye jen pou bout 30 novanm 2022 a soti deyò kèk jou anvan sezon an demare.

Daprè gwoup watsap « Mr Météo » Rudy Victor ap administre se chak 6 lane menm 21 non siklòn sa yo retounen. Sòf si youn ladan yo te fè gwo dega nan pasaj yo, yo ka mande se retire l nan lis la. Ladan l gen tanpèt ak matonton siklòn ki ka frape Atlantik la, basen Karayib kou Gòl Meksik la paske li sou wout yo.

Dapre save yo, gen 65 % chans pou gen plis aktivite jan sa konn ye, 25 % chans pou l nòmal epi 10 % chans pou gen mwens aktivite.

Daprè Rudy Victor ki pale ak radyo Tele Montagna, mèkredi 25 me a fè konnen, malgre tout non sa yo okenn moun pa ka di plis sou direksyon yo ka pran. Li kontinye pou l di depi 2007 pa gen siklòn ki monte sou basen karayib la sòf matonton siklòn Matchou mwa oktòb 2016 pase a. Men menm li pa t fè tout basen Karayib la soti nan lès al nan lwès. Sòf ane sa a gen kèk paramèt ki ta montre Karayib la gen yon ti chans pi wo parapò ak jan sa ye pou yon siklòn layite kò l sou li.

Nan peyi pa nou, chak grenn non sa yo ki parèt sou lis sa a reprezante yon malè pandye pou anpil peyi Karayib la espesaylman peyi Dayiti , kote otorite yo pa janm pran twòp mezi pou evite dega kite ka evite.

Okenn manifestasyon natirèl se pa yon fado oubyen yon malediksyon. Tout Kote Leta ap jwe wòl sèvitè li dwe pran tout dispozisyon pou l enfòme popilasyon l, sansibilize l epi mete tout batrantran mwayen li yo la nan kesyon dezas pou rapid li pote sekou bay sitwayen yo.

Maks – Enmbèr Marslen