Alòske fanatik yo te ret ap tann depi kèk tan, gwoup Kompa Nu-Look pou bonè meloman yo mete deyò madi 8 out la yon mizik ki gen pou tit ”Mea Culpa. Arly Larivière ki se chantè, konpozitè Jazz la nan tèks sa temwanye li pat konn sal te vle, li te yon adolesan, li fè anpil erè, li mande padon.
Mizik la akonpanye ak tout videyo, li dire 6 minit. Nan 15 èd tan sèlman plis pase 66 mil moun gentan gade video a sou Youtube sèlman. Nan tèks mizik la, konpozitè Nu-Look lan pat pase nan 4 chemen pou delivre mesaj la nan yon bèl melodi. ”A tout moun mwen fè mal mwen swete ke nou konprann mwen” Nan menm tèks la Arly raple pa gen moun ki pa peche li envite tout moun aprann de erè yo te fè.
Nouvo mizik sa ak tout videyo gwoup kompa Nu-Look mete deyò a deja alimante gwo deba sou entènèt la. Fanatik kap sipòte djaz la aplodi zèv mizikal sa, e yo kwè konpozitè a fè yon gwo travay sitou nan tèks la ak melodi an. Sila yo ki pa sipòtè Nu-Look pa neglije pote anpil kritik sou mizik la, pou anpil nan yo se yon bouyon rechofe, yo kwè tou atis la kontinye ap plenyen nan mizik yo.
