Òganizasyon Pèp kap Lite montre li enkyete anpil fas ak sitiyasyon difisil pèp Ayisyen an ap konnen e ki vin pi grav ak dènye mouvman manifestasyon kont monte pri gaz la.
Nan yon nòt pou laprès ki parèt jodi madi 20 septanm nan, estrikti politik ansyen senatè Edgard Leblanc Fils ap dirije a di li konstate otorite gouvènman yo bouche zòrèy yo devan revandikasyon popilè a.
“Non Dr Henry! Tout peyi a leve kont move gouvènans epi li di sispann! Peyi a riske plonje nan dezòd total kote tout moun pral pèdan,” se avètisman sa ansyen senatè Leblanc lanse bay chèf gouvènman an.
“OPL kwè sa a se moman pou aktè yo pwouve sans responsablite yo. Se devwa yo pou jwenn solisyon pou mete fen nan kriz la,” se sa estrikti politik la fè konnen.
Yon lòt bò, Òganizasyon Pèp kap Lite kondane zak vyolans ak piyaj ki anrejistre pandan manifestasyon yo men li di li sipòte divès manifestasyon popilè yo ki vize fòse otorite yo tande la rezon.
