Jodi mèkredi 20 desanm 2023 a, plizyè anplwaye “Service Nationale de Gestion des Résidus Solides (SNGRS)” te pran lari zòn Ti Plas Kazo ki sou wout Karade a pou yo denonse move jesyon responsab yo ap fè nan enstitisyon sila. Pwotestatè yo te boule kawoutchou, yo te mete barikad nan antre lokal enstitisyon an.
Byen bonè nan maten mèkredi 20 desanm nan, plizyè anplwaye SNGRS, (youn nan sant k ap jere fatra nan peyi a) te bloke lari Ti plas Kazo a pou di non ak move jesyon responsab yo ap fè nan bwat sila. Manifestan yo pa t sispann lonje dwèt sou direktè bwat sa : Mesye Paulémon Germain, ki daprè anplwaye yo anpeche enstitisyon an byen fonksyone.
Pwotestatè yo ki te move anpil te boule kawoutchou, bloke antre ki mennen nan lokal SNGRS la. Yo te pwofite okazyon sa pou mande kat debi yo yo pa janm jwenn ak bonis pou fèt fen ane a.
Sitiyasyon sa te paralize tout aktivite nan zòn Ti Plas Kazo a.
Carl Henry Florant
