Biwo kowodinasyon Zafè limanite pou Nasyonzini (OCHA) fè konnen kolera ta mete pye l nan Lise Marie Jeanne kote ki gen anpil Moun ki te pran refij akoz ensekirite a. Nan yon rapò l pibliye lendi 25 mas la, enstans entènasyonal la fè konnen li detekte 10 moun ki ta prezante sentòm maladi kolera a nan espas 48è.
Rapò sa ki fèt 22 mas pou rive 25 mas 2024 la chita sou sitiyasyon sanitè peyi a sin kwè OCHA. Aprè l fin anonse 10 moun nan Lise Marie Jeanne ki ta trape maladi kolera, OCHA drese yon tablo nwa sou sitiyasyon peyi a sitou sou sitiyasyon sanitè a.
Plizyè lopital oblije fèmen pot yo nan kapital la akoz zak vyolans yo tankou lopital Berna Mervs pi gwo sant ospitalye peyi a lopital jeneral .Nou pap bliye tou yon kantite lòt ki piye tankou zail franse ak ”st François de Sales ”. Sant anbilansye nasyonal kite fèmen pòt li 21 mas pase ouvè 25 mas 2024 la, epi li transfere plizyè anbilans nan lopital inivèsite Lapè a ki nan Dèlma 33.
Daprè rapò a sitiyasyon ensekirite peyi a bloke aksè pou yo pote èd bay moun yo nan diferan rejyon yo. Èd sanitè yo pa ka rive nan destinasyon yo. Nan menm moman, kantite moun ki te nan abri yo double dènye jou sa yo akoz denye vitès gang yo pase la ki pouse rès moun anba lavil yo kite kay yo. Sa ki ta ogmante travay enstans sanitè yo anndan peyi a.
N ap raple OCHA nan avan dènye rapò te revele ka kolera yo ogmante tou piti nan depatman Latibonit (zòn Sen Michel) ak nan Nòdès. Pi gwo pwoblèm nan chita nan difikilte yo genyen pou yo pote medikaman bay lopital nan rejyon, pou yo te ka pran swen moun ki kontamine nan epidemi sila.
Carl Henry Florant
