“Djery” se manm gang “Taliban” kap opere nan zòn Kanaran ki mouri nan echanj kout zam ak Lapolis pandan yon operasyon tcheke machin nan lokalite “Moleard”, zòn Bon Repo nan komin kwadèboukè.
Selon responsab PNH yo, Djery ak plizyè endividi ak gwo zam te nan yon Land Cruiser yo tap rantre nan baz yo ak 2 moun yo te sot kidnape, pami yo pwopriyetè yon otèl nan zòn nan. Se pandan yo tap rantre nan baz, yo al tonbe sou kèk ajan PNH,i yo tire sou polisye yo, nan echanj kout zam, yon bandi tonbe, 2 lòt ki blese rive chape poul yo. Lapolis rive libere 2 moun yo te kidnape yo, men yo pa revele idantite moun sa yo.
Nan operasyon sa, fòs lòd yo rekipere 3 zam, 2 pistolè yon fizi kalib M4, toyota Land Cruiser mesye sa yo te ladann nan ak 2 motosiklèt.
Jean Kenson CARRIES (JKC)
