Lapolis nasyonal la nan yon nòt ki parèt madi 26 mas 2024 la prezante bilan dènye operasyon ak entèvansyon l yo. Daprè bilan sa ,soti 29 fevriye pou rive 26 mas 2024 la, disèt (17) bandi pèdi lavi yo, Lapolis la sezi disèt (17) zam fann fwa epi li sezi yon machin bandi yo te konn opere.
Lapolis nasyonal peyi Dayiti a fè konnen li pa kanpe travay malgre gang yo kontinye ap vale teren sitou nan zòn metwopmolitèn Pòtoprens la. Daprè bilan PNH la prezante jodi a, 17 bandi ak zam tonbe nan kad operasyon ajan Lapolis la ap mennen dènye tan sa yo. Pami bandi sa yo ki pèdi lavi yo nou jwenn n ap site chèf gang ki t ap opere nan Dèlma 95 la, Ernst Julmé alyas Ti Grèg ak Makandal.
Nan operasyon ak entèvansyon sa yo ki tannmen depi aprè seri atak endividi ak zam yo, Lapolis la rive rekipere 17 zam fann fwa ki se zam kalib 12 AK 47, yon pistolè 9mm ak yon M4. Yon lòt kote ajan PNH yo te rive rekipere yon machin bandi yon konn sèvi pou komèt zak yo.
Nan dokiman sa lapolis konfime yo te rive repouse atak gang yo sou katye wo Dèlma ak Petyonvil ak atak sou bank santral.
Toujou daprè nòt PNH la, responsab tout kò espesyalize nan enstitisyon polisyè a resevwa enstriksyon pou yo kontinye mennen operasyon yo nan kat kwen peyi a nan lide pou pèmèt lavi repran nòmalman anndan peyi a. Se Direktè Jeneral Lapolis, Mesye Frantz Elbé ki pase seri enstriksyon sa yo.
PNH la pwomèt pou l kontinye kenbe angajman l bò kote popilasyon Ayisyèn nan ki se pwoteje ak sèvi yo pandan l ap kontinye batay Kont gang ak zam yo.
Carl Henry Florant
