Kredi foto : Tele Pam
Nan kad selebrasyon 113 lane ekzistans lekol “Sainte Trinité” vandredi 21 jiyè a mèt Samuel Madistin pat met dlo nan bouch li pou kritike sistèm jidisyè ak otorite nan lapolis ki daprè li kite opinyon piblik la manipile yo, epi yon opinyon piblik ki limenm deja manipile.
Pou avoka a enstitisyon an kap sèvi sosyete a depi kèk tan trennen nan labou akoz akizasyon sa yo ki poze sou dol nan kad dosye kagezon zam lan.
Mèt Madistin lonje dwèt li byen long sou otorite jidisyè ki pou fè koripsyon oubyen kraponaj deside pran liy opinyon piblik manipile a olye pou yo swiv konsyans yo.
Menm otorite polisye yo tou ale nan menm sans lan olye yo pran kouraj pou atake vrè trafikan zam yo pito fè yon travay fasil toujou daprè ansyen kandida pou pòs prezidan nan dènye eleksyon yo.
Entolerans, emosyon,pasyon avèg te vle pran pye sou larezon daprè Mèt Madistin ki renouvle angajman pou mete prestij li entegritel pou sèvi legliz sa, sèvi laverite sèvi lalwa nan moman difisil sa. Mèt Samuel Madistin bay garanti ak responsab yo nan legliz Episkopal verite a ap pran lari kanmèm. Nap raple gen divès responsab enstitisyon an ki deja nan prizon akoz dosye sa .
