Se atis la ki kominike enfòmasyon an sou rezo sosyal Instagram ak Wathsapp ayè dimach 21janvye 2024 la. Ansyen chanpyon “Podium Quartiers” a, Clifford Dumé fè konnen bandi tiye papa l nan Kwadèboukè epi yo pati ak yon ti sè l. Yon aksyon ki pase devan lise Jacques 1er a.
Clifford pèdi papa l ayè dimanch la. Bandi k ap opere nan komin Kwadèboukè ouvè bal sou yon machin papa l te ye ak ti sè l ak yon kouzen l. Papa atis la mouri menm moman, kouzen an kouche sou kabann lopital nan yon move eta. “Yo touye papa m, yon ti kouzen m byen mal lopital”, se sa atis ki te chante mizik lanmou inosan anonse fanatik li yo avan li kontinye pou li di ” Yo kidnape yon ti sèm”.
Chantè a mande kidnapè yo pou yo libere ti sè l tanpri paske fanmi an pa gen kòb.
