Relijye kongregasyon ST Anne yo jwenn liberasyon yo jodi mèkredi 24 janvye 2024 la. Kidnapè te pran moun sa yo nan kapital Pòtoprens la vandredi 19 janvye pase a.
Byen bonè nan maten vandredi 19 janvye pase a, yon gwoup nèg ak zam te kidnape yon gwoup relijye kongregasyon ST Anne ki te nan yon ti bis ki ta prale nan inivèsite kongregasyon an. Daprè enfòmasyon redaksyon an te rive jwenn, kidnapping sa rive fèt nan wout Avni Christophe la nan kapital Pòtoprens la.
Yon sitiyasyon ki ta pral pouse Pap François reyaji sou zak kidnapping sa ak sitiyasyon peyi Dayiti ap konnen dènye moman sa yo. “Mwen aprann ak anpil tristès nouvèl anlèvman gwoup relijye ak lòt moun ki te avèk yo nan Pòtoprens. Pandan m ap mande ak tout kè m liberasyon yo, m ap priye pou lapè ak tèt ansanm tounen nan peyi sa a,” se sa Pap François te deklare nan Kad dosye sa a. Yon lòt kote kèk lekòl nan kongregasyon an tankou kolèj Marie-Anne te fèmen pòt yo pou pwoteste konk zak kidnapping sa.
Mèkredi a nan aswè daprè enfòmasyon redaksyon an kolekte, bandi ak zam yo libere sis (6) relijye yo yo te kidnape nan avni Christophe la. Enfòmasyon yo pa revele montan liberasyon sila.
Carl Henry Florant
