Bank Entè-Ameriken Devlopman (BID) pwomèt pou l debloke yon anvlòp 40 milyon dola ameriken pou Ayiti ane sa a. Angajman sa a te pran lendi 1ye jiyè a pandan yon rankont ant lidè BID yo ak yon delegasyon ayisyen ki gen nan tèt li Premye minis Garry Conille k ap vizite New York.
«Nou angaje anpil nan sipòte Ayiti epi n ap kontinye travay ak otorite yo pou amelyore lavi pèp ayisyen an,» se sa nou te ka li sou kont ofisyèl BID sou X, bank lan renouvle yon lòt fwa angajman li anvè Ayiti.
An menm tan, Premye minis Garry Conille eksprime gratitid li bay BID pou sipò li kontinye bay Ayiti. «Mwen remèsye Bank Entè-Ameriken pou Devlopman an pou angajman li anvè Ayiti ak pwomès 40 milyon dola pou ane sa a. Nou pral revize pòtfèy la pou nou alimante li ak nouvo priyorite anvan eleksyon yo epi koòganize ak lòt patnè yo yon gwo rankont mobilizasyon finansman pou Ayiti ak patisipasyon sektè prive a,» se sa chèf gouvènman te deklare sou kont X li.
