Brigad sendikal anti koripsyon bay otorite yo 3 jou pou rezoud pwoblèm sekirite a. Nan yon konferans pou laprès jounen lendi a Dume Sonson dekri yon sitiyasyon tèt chaje sektè transpò a ap viv depi anviwon 3 lane kote Chofè yo oblije ap peye bandi anpil lajan pou yo kapab frekante wout nasyonal yo anba bouch gwo zam. Sèten chofè ak mèt machin oblije abandone sektè a akoz estrès, oubyen yo pa rive fè ase lajan pou ede tèt yo ak fanmi yo. Dènye gwo koze a se nan Maryani komin Gresye kote bandi enstale yo depi anviwon yon mwa.
Sitiyasyon Maryani an lakoz rate kèk pwodwi nan gran Sid la tankou Okay, Jakmèl, galon gaz oblije monte disèt wotè San konte anpil antrepriz ki oblije fèmen pòt yo akoz yo paka jwenn gaz propan.
Sendikalis la kritike otorite yo ki kwaze bwa yo ap tann fòs entènasyonal olye yo itilize fòs lame a kap touche san travay. Menmsi yo pa anpil gouvènman te kapab melanje FADH ak PNH la pou kwape gang yo selon Dume Sonson.
Nap raple malgre Lapolis souvan sinyale prezans yo nan Maryani anyen pa chanje nan zòn sa, machin sid yo te konn kanpe Gresye pou pasajè yo pran ti kanòt ,chèf gang Maryani an “Bout ba” entèdi sistèm transpò sa. Nap raple tou Bandi yo te tire sou kannòt sa yo kote plizyè moun te mouri pami yo kèk ti machan ak kapitèn yo.
