Nan dènye rapò li a, Sant pou analiz ak rechèch sou dwa moun nan (CARDH) fè konnen li konte anviwon 150 moun ki mouri, pami yo 70 moun ki mouri nan kan gang ame yo, ak anviwon 300 blese nan eklatman lagè gwoup ak zam nan Site Solèy.Daprè òganizasyon kap defann dwa moun nan, gen plizyè milye abitan ki kwense nan komin nan e sitiyasyon sa lakoz yon kriz imanitè.
Selon òganizasyon dwa moun nan, nan Site Solèy, nan Matisan ak nan plèn nan, ak lòt kote ankò , gang yo angaje nan yon gwo batay pou pran oswa kenbe teritwa yo. Nan batay sa yo se popilasyon an ki toujou pi gwo pèdan, yo souvan pèdi lavi yo ak byen yo posede. Fòk nou raple Gouvènman Ariel ap dirije a pwomèt yon asistans a moun Site solèy yo.
Pou estrikti sa a, aksyon gang ame yo rete makonnen ak jwèt kap jwe pou pwochen eleksyon yo ak yon fason pou moun vin riche nan trafik zam. CARDH denonse tou zak kidnapin ki dekapitalize sitwayen yo, li mete aksan sou machin ki anrejistre kòm “Ofisyèl”, “Sèvis Leta”, “Kò Diplomatik” ak “Òganizasyon Entènasyonal” nèg ak zam fann fwa itilize pou fè zak malonèt sa yo.
