Gouvèman ayisyen an lanse vandredi 31 mas 2023 a yon platfòm randevou sou entènèt pou fè demand paspò ak kat idantite nasyonal ki batize: DELIDOC. Nan seremoni lansman nouvo zouti sila a , Premye Minis Ariel Henry enskri demach sa a nan kad amelyorasyon sèvis piblik yo anfavè manm popilasyon an. Gwo anbouteyaj devan biwo imigrasyon yo se yon move imaj pou peyi a selon chèf Gouvènman ki fè konnen yo pat pare pou livre 300 mil paspò nan 2 mwa.
Yon ekip ekspè te mete kanpe pou elabore zouti teknolojik sila a. Yon moun ki vle pwodwi yon demand pou paspò oswa kat idantifikasyon dwe rann li sou sit sa www.DELIDOC.gouv.ht/delidoc pou li ranpli divès etap konsènan demand li an. Selon Michel Colbert k ap dirije e-gouvènans nan primati.
Direktè Ofis Nasyonal Idantifikasyon (ONI), Renold Guerrier ki tap patisipe nan seremoni sa te profite anonse enstitisyon l ap dirije a ap travay sou yon pwojè pou idantifye sitwayen yo depi yo fek fèt.
N ap soulinye moun ki finn fè demand lan dwe enprime resi aplikasyon an epi pote nan biwo enstitisyon an li pwodwi demand pyès idantite a yon manyè pou li kapab rekipere dokiman an.
Arnold Junior PIERRE
arnoldjuniorpierre@gmail.com
