Konsèy prezidansyèl tranzisyon an te òganize madi 21 me 2024 sa a, yon seyans travay ak wo kòmandman polis nasyonal Dayiti a.
KPT a te pwofite okazyon sa pou diskite ak DG PNH la ak manm dirijan enstitisyon an sou operasyonalizasyon Misyon Sipò Sekirite Miltinasyonal la ki ka rive nan fen mwa me sa,selon yon nòt prezidans la.
Toujou daprè nòt la, Ayiti, atravè Polis nasyonal la, pral gen kontwòl jeneral sou operasyon misyon sa a sou teren an. Kit sa konsène konpozisyon, objektif, règ angajman ak kontwòl sante twoup yo, tout bagay pral kowòdone ak sipèvize ak otorite polis ayisyen yo.
N ap raple daprè eleman enfòmasyon yo twoup kenyan yo sipoze rantre nan peyi a nan jou k ap vini la yo. Annatandan travay yo ap vanse pou finalize konstriksyon baz misyon an ap vanse. Jounen ledi 20 me a yon delegasyon ki gen nan tèt li komandan MMS la te rive nan Pòtoprens pou dènye mizanplas yo.
