Nan okazyon premye me sa a, ki se fèt agrikilti ak travay, konsèy prezidansyèl nan yon nòt ki pote siyati prezidan l, Edgard Leblanc Fils, wete chapo pou salye fòs viv peyi a, travayè latè ak izin yo.
“Nan okazyon premye me 2024 la ki se fèt Agrikilti ak Travay, Konsèy Prezidanyèl Tranzisyon an salye tout fòs viv peyi a, an patikilye travayè latè ak travayè nan izin yo.” se sa nou li nan kòmansman kominike a.
Konsèy la ki gen kèk jou depi l envesti nan pòs li fè konnen se ak anpil lapenn n ap komemore dat sa akoz sitiyasyon malouk peyi Dayiti ap konnen. “Se avèk tristès nan kè nou, n ap komemore ane sa a fèt le me a akoz sitiyasyon malouk sou tout plan, espesyalman sou plan sekirite peyi a ap travèse ki jete yon pil ak yon pakèt anplwaye nan chomaj, ki kraze biznis anpil sitwayen, ogmante mizè malere nan peyi a epi sitou bare solèy lespwa pèp la”, toujou daprè konsèy la. KPT a pwomèt ak sipò chak grenn Ayisyen, pou l reprann bak peyi a epi fè l vanse nan bon direksyon.
Yon lòt bò, konsèy la voye yon gwo kout chapo pou tout patwon ki refize bese bra yo, ki vle kenbe la, kinalaganach, malgre sitiyasyon difisil n ap viv la. “Eritaj Konsèy la jwenn nan lou anpil men li detèmine pou l travay san pran souf nan kad misyon I pou l fè sekirite tounen tabli nan peyi a, garanti lavi, byen ak biznis tout moun, rebay Leta fòs ak otorite pou dirije Nasyon an, rezoud diferan defi yo epi fè lavi a vin miyò chak jou pi plis pou chak Ayisyen alawonnbadè,” se sa nou li nan fen kominike a.
