Federasyon Entènasyonal Foutbòl Asosiyasyon an (FIFA) nonmen Madam Gally Amazan nan komite nòmalizasyon ki nan tèt Federasyon Foutbòl Ayisyen ki gen sig li nan lang fransè a FHF, ayè lendi 8 janvye 2024 la. FHF fè anons sa, jodi madi 9 janvye 2024 la nan yon kominike li pibliye sou paj Facebook li a.
Gen yon nouvo manm ki entegre komite nòmalizasyon k ap gouvène Federasyon foutbòl ayisyen an. Li rele Gally Amazan, yon dam ki genyen 28 lane eksperyans nan domèn kontabilite ak jesyon finans daprè sa FHF fè konnen. Se yon pwofesyonèl akonpli si n kwè komite nòmalizasyon an.
Madam Amazan gen de (2) metriz, youn nan domèn dirije òganizasyon espòtif nan inivèsite Claude Bernard Lyon nan peyi Lafrans ak youn nan Administrasyon nan Inivèsite Ottawa, nan peyi Kanada. Ansyen jwè Volleyball la genyen tou yon lisans nan administrasyon nan inivèsite Leta ayisyen ak yon espesyalizasyon nan Syans kontab nan INAGHEI.
Madam Amazan ki se tou ansyen coach volleyball genyen tou kat (4) lane fòmasyon nan Syans ekonomik nan Fakilte Dwa ak Syans ekonomik. Madam Gally genyen yon pakou pwofesyonèl ki entèresan. Non sèlman li jwe wòl Direktris k ap kontwole epi jere pi gwo konpayi petwòl peyi a (Distributeurs Nationaux SA), li travay tou kòm anseyan depi 2004 nan inivèsite kòm kòdonatè de (2) pwogwam metriz nan inivèsite Kiskeya. Li se tou animatris seyans fòmasyon ak seminè.
Komite a kwè anpil nan madam sa FIFA nonmen pami yo a. FHF kwè nan kapasite l genyen pou pote komite sa a konkou ki poko janm ka delivre machandiz FIFA ba l livre a.
Carl Henry Florant
