Nan yon rapò anviwon uit (8) paj ki pibliye madi 7 me 2024 la, Fondasyon Je Klere (FJKL) salye etap enpòtan ki franchi pou tabli laverite atravè òdonans jij enstriktè nan Tribinal premye enstans Mibalè a, Edwige Dorsainvil, rann nan kad asasina jounalis Néhémie Joseph.
Konsènan motif krim nan FJKL souliye ankèt la revele ke jounalis la viktim yon gwo konplo ki te monte nan meri Mibalè a epi ki egzekite sou lòd yon responsab sekirite nan meri sa, menm responsab sekirite sa se yon ansyen ajan sekirite tou nan palman ayisyen an. Santimantal, ekonomik ak politik se motif krim sa.
Pandan l bay detay sou anpil pwen nan òdonans sa a, Fondasyon Je Klere di li regrèt limit dokiman sa , li mete aksan tou sou evolisyon dosye sa a jiskaske yon pwosè ki jis epi ekitab òganize pou pèmèt pèp ayisyen an, nan kad yon deba kontradiktwa, dekouvri verite a epi wè tout responsablite yo fikse nan kad krim sa a. FJKL mande gouvènman an plas la pou debarase meri Mibalè a ak majistra Lochard Laguerre ki gen akizasyon sou do l nan dosye sa.
Néhémie JOSEPH, se te animatè vedèt yon emisyon sosyo-politik, ki te popilè nan vil Mibalè, ki te pase sou radyo “Panik FM”, nan Bayas epi li te tou korespondan Radio Méga nan Pòtoprens, yo te jwenn li mouri nan kòf machin li toupre Pak Bayas anba seksyon kominal Sarazen nan komin Mibalè Jou ki te 10 oktòb 2019, vè 8è nan aswè, daprè FJKL.
Fòk nou raple òdonans sa a ki gen dat 8 mas 2024 la, mete sou kote Yolette Jeanty ak Garry Pierre Paul Charles epi voye Chandou Clerjeune, Rony Celestin, Elionel Casseus, Angelina Fabiola Cameau, Lochard Laguerre, Rosevald Douyon, Lenel A.C ak Huguens Charles al jije devan tribinal Kriminèl avèk asistans yon jiri pou yo jije daprè dispozisyon atik 44, 45, 241 nan kòd penal la.
