Seleksyon ayisyèn senyò fanm nan rate antre yo nan kalifikatif pou koup di mond fanm 2023, kont ekip Amerikèn (3-0) Ayè lendi a sou teren Universitario de Monterrey la. Pandan l tap onore 193èm seleksyon li kont Grenadyè yo , Alex Morgan make 2 fwa e lòt gòl Ameriken an se Margaret Purcé ki makel kèk minit avan fen match la.
Dominatè pandan match la, fòmasyon Amerikèn nan te delivre yon match serye, Ayisyèn yo nan premye peryòd la te piti piti leve nivo jwèt yo e li te vin pote rezilta. Nan peryòd sa a ayisyen yo te ofri tèt yo twa vrè opòtinite danjere tankou yon tèt Ketna Louis ki ale sou poto a ak yon penalite Roselord Borgella te rate. Dezyèm mitan match la te vin gen plis angajman, seleksyon Amerikèn nan te kontinye rete byen an plas, Grenadyè yo te souvan gen balon men yo pat rive destabilize defans ekip USA la ki te byen solid.
Pou premye rankont li nan konpetisyon an, randman gwoup Ayiti a pat nan nivo talan medam yo. Pa tout mwayen, leve nivo jwèt ekip la kont Meksik ak Jamayik dwe yon nesesite si Ayiti vle kalifye pou Koup di mond 2023.
JKC
