Pandan l ap prepare pou l jwe kont Benfica jodi madi sa a nan Lig chanpyon an, Kylian Mbappé ap fè pale de li an Espay. Journal Marca anonse ke Fransè a mande poul kite Paris Saint-Germain nan mwa janvye.
21 me 2022. Kylian Mbappé pwolonje ofisyèlman kontra li ak Paris Saint-Germain jiska jen 2025. Foutbolè fransè a finalman di non ak pwojè Florentino Pérez ak Real Madrid la. Se te yon gwo souflèt pou Merengues yo ki te panse ke Mbappé ta pral debake nan klèb Madrid la. Nasser Al-Khelaïfi ak dirijan Parizyen yo te konvenk KM7 ke li pral nouvo sipèsta nan pwojè Parisyen an devan Neymar ak Leo Messi.
Men plis pase kat mwa apre siyati kontra li a, anyen pap mache byen pou krak Bondy a. Premyèman rekritman PSG yo pat konble atant li. Answit relasyon li ak kèk patenè, espesyalman Neymar te kômanse degrade.
Daprè Marca ki kontakte antouraj jwè a, eksplike relasyon ant atakan 23 lane a ak PSG koupe. Toujou selon jounal la Fransè a ta deja ap travay poul kite PSG nan mwa janvye 2023. Marca revele tou ke Paris ta dakò “kolabore” ak jwè a. Men, dirijan yo nan Parc des Princes lan ta sepandan pa ta dakò pou jwè a al jwenn Real Madrid, Liverpool ta donk youn nan opsyon yo pou Kylian. Yon lòt paj nan feyton Mbappé a relouvri.
