Manchester City nan Etihad Stadium lan laminen ekip Arsenal (4-1) mèkredi 26 avril la nan kad 33yèm jounen Premier League lan. Kevin de Bruyne ki make 2 gòl nan match chòk sa se gran atizan viktwa ekip Guardiola sou Gunners yo.
Nan match sa ki te parèt yon final nan kous pou genyen chanpyona Anglè a, ekip Arsenal lan ki gen nan tèt li Mikel Arteta prèske pat egziste ofansivman. Man City gras ak yon gwo premye mitan te deja mete menl sou match la. Jwè entènasyonal Belgique lan, Kevin De Bruyne te enskri premye gòl Mancunien yo nan premye mitan sa (1-0 7e), answit Stones te make dezyèm gòl Citizens yo aprè yon koufran De Bruyne te depoze sou tèt li (2-0, 45e+). 2-0 avan poz lan li te parèt klè City pral genyen match li.
Dezyèm mitan lage, pwoteje Guardiola yo pat pran tan pou te enskri twazyèm gòl yo gras ak Kevin De Bruyne yon lòt fwa (3-0, 54e). Malgre ekip Arsenal te make yon gòl (3-1,87e), se te byen konte mal kalkile, Erling Haaland nan fen match la te krisifye Gunners yo (4-1,94e+). Se 33yèm gòl Haaland nan PL lan sezon sa.
Viktwa sa se setyèm viktwa ekip Guardiola youn kole ak lòt, pou kounya Arsenal premye nan klasman chanpyona ak 2 pwen anplis City men ekip Arteta jwe 2 match anplis Man City. Arsenal febli City ak Guardiola sou wout pou genyen tit la ankò.
