Konsèy prezidansyèl tranzisyon an chwazi madi 28 me 2024 la ansyen Premye minis sou prezidans Michel Martelly a,Gary Conille, kòm Premye minis pou dirije pwochen gouvènman tranzisyon an.
“Apre yon odyans inèdtan pou chak nan senk (5) kandida ki te seleksyone yo, madi 28 me 2024 la, Konseye prezidansyèl yo chwazi atravè konsansis, mesye Garry CONILLE kòm nouvo lokatè biwo primati a.” se sa ki ekri nwa sou blan nan yon kominike pou laprès prezidans mete deyò.
Toujou daprè kominike sila, sèl Régine ABRAHAM ak Laurent SAINT-CYR twouve yo deyò peyi a, tout sèt (7) lòt Konseye-Prezidan yo te patisipe nan odyans senk (5) kandida ki te seleksyone yo pou pòs Premye minis la.
Pi devan konsèy la fè konnen yo gentan ap travay ak Premye minis nonmen an pou chwazi diferan pèsonalite pou fòme kabinè ministeryèl la.
Yon lòt bò, KPT a pwofite renouvle detèminasyon fèm li pou fè tout sa ki posib pou kanpe fenomèn ensekirite a epi mennen peyi a sou chemen eleksyon lib, onèt, demokratik ak enklizif.
