Seleksyon nasyonal feminen an tonbe (1-0) devan ekip Pòtoriko a jodi samdi 17 fevriye 2024, nan okazyon match baraj ki te konte pou kalifikasyon premye edisyon Gold Cup feminen 2024 la. Yon defèt ki kite yon move gou nan bouch fanatik foutbòl lokal yo.
Si fizyonomi match la te montre Ayiti kapab pase ekip Pòtoriko a yon rakle, se pa Ayiti ki genyen match la poutan. Medam yo daprè ekspè nan jwèt la konfonn vitès ak presipitasyon sa ki fè yo pa janm ka fini aksyon yo kreye yo nan tout match la. Absans anpil jwè Kad yo tankou Melchie Daëlle Dumornay ki gen kapasite pou l ni fè gòl ni fè pas kle yo, te parèt klè nan match sila.
Bò kote ekip advèsè a, yo te rete disipline menm gen anpil enpèfeksyon nan jwèt yo, se yo menm ki ranpòte match la. Medam Pòtoriko yo enskri grenn gòl match la sou penalite nan 42e minit. Se … ki te transfòme penalite sa. Ekip Pòtoriko a tou kapab remèsye gadyen yo a ki jwe yon gwo match. Li retire anpil balon e menm repouse penalite pou Nérilia Mondésir nan …
Ayiti elimine definitivman. Grenadye yo pa pral jwe premye edisyon Gold Cup k ap fèt nan mwa sa menm. Pòtoriko rejwenn Brezil, Kolonbi ak Panama nan gwoup B a. Pòtoriko ap antre nan batay mèkredi 21 fevriye 2024 la kont ekip Brezil la.
Kapitèn anblematik seleksyon an Nérilia Mondésir rete kwè ekip la se chans li pa t genyen ki fè l pa kalifye. Paske ekip kite an fas yo pa pwodui anyen pou yo ta bat yo. “Tout sa m ka se nou pa t gen chans. Nou pa t efikas devan kan. Yo pa atake nou, yo jwenn yon penalite, yo fè gòl la. Nou menm, nou jwenn yon pakèt okazyon nou pa konkretize yo. Mwen dezole!” Se sa nimewo 10 Grenadye yo deklare aprè match la.
Carl Henry Florant
