Manifestasyon kont gouvènman an plas la kontinye ap miltipliye nan tout peyi a chak jou ki jou. Jodi Madi a, pwotestatè yo nan Gonayiv piye epi mete dife nan lokal yon otèl ak Radyo Endepandans, ki se pwopriyete Minis Defans la, Doktè Enold Joseph.h
Manifestan yo trè fache kont Doktè Joseph paske li te poze siyati l anba rezolisyon ki te mande entèvansyon yon fòs ame etranje prese prese nan peyi a. Manifestan yo te mande avan sa pou Minis Joseph demisyone.
Fòk nou raple ayè lendi a, manifestan yo te piye epi mete dife nan tribinal Gonayiv la. Toutapatou nan peyi enstitisyon prive kou piblik anba menas piyaj. Pwotestatè yo fè konnen se demisyon Premye minis Ariel ak tout gouvènmanl lan ki fè yo kite beton an.
