492 140 migran Ayisyen kite Repiblik Dominikèn pou ane 2023 sa, daprè dènye chif “Groupe d’Appui aux Rapatriés et Réfugiés (GARR)” pibliye.
Sam Guillaume, ki se responsab kominikasyon ak pledwaye nan GARR fè konnen genyen 224 614 nan migran sa yo ki te rapatriye ak 51 496 ki te reprime. Pami migran sa yo genyen 16 813 minè ladan yo ki pa t jwenn akonpayman, te genyen tou 147 fanm ansent.
Ajoute sou doulè ak soufrans migran sa yo responsab GARR yo fè konnen genyen plizyè ka vyòl ki fèt sou Ayisyen sa yo nan moman rapatriman anba men Dominiken ak ajan imigrasyon yo, ki menm rive bat yo.
Kantite migran Ayisyen ki ap sibi zak vyolans kay vwazen pa sispann monte chak jou pi plis, dirijan Ayisyen yo pa voye je gade nan ki kondisyon migran Ayisyen yo ap viv kay vwazen pou fè dwa yo respekte jan sa dwe ye, daprè lwa òganizasyon mondyal imigrasyon etabli.
