Alòske enstitisyon polisyè a te pwograme yon konferans pou laprès vandredi 9 fevriye a nan Klèsin, plizyè dizèn jounalis ki te prezan deside bòykote konferans sila pou pwoteste kont britalite polisye yo sou jounalis pandan dènye mouvman pwotestasyon yo nan peyi a.
Mouvman bòykotaj sa vini aprè jounalis Jean Marc te viktim britalite lapolis pandan yon manifestasyon. Travayè laprès la te resevwa yon bonbòn gaz lakrimojèn nan je.
Jounalis yo mande jistis pou kòlèg yo, pandan yo tap denonse aksyon vyolan fòs lòd yo. Devan mouvman sa a, pòtpawòl PNH la, Garry Desrosiers, te oblije anile prezantasyon li nan konferans pou laprès la.
Pòtpawòl la te oblije ale lopital jeneral pou vizite jounalis ki viktim nan, li pwomèt pou l transmèt dòleyans jounalis yo nan pi wo nivo nan PNH la.
