Joverlein Moïse, lanse dimanch 7 jiyè 2024 sa a, nan okazyon twazyèm komemorasyon asasina papa l Jovenel Moïse, Asosyasyon pou batay kont enpinite ak enjistis (ALII). Prensipal misyon asosyasyon sa a se fè limyè sou sikonstans asasina 58yèm prezidan ayisyen an, Jovenel Moïse.
Twazan apre evenman trajik sa a, fanmi Jovenel Moïse toujou ap rankontre difikilte pou jwenn jistis malgre efò tribinal ki responsab dosye a ap fè. Joverlein Moïse, ki touche pa sitiyasyon sa a, asire li pa pral abandone batay la pou «papa li, bousòl li, prezidan li».
Daprè Joverlein Moïse, asosyasyon an (ALII), ki te fonde sa gen kèk mwa: «gen misyon prensipal pou fè limyè sou sikonstans asasina 58yèm prezidan ayisyen an, papa m Jovenel Moïse, men tou men nan batay kont tout fòm enpinite ak enjistis ki nan pifò ka yo kite viktim yo san vwa ak san okenn posiblite pou jistis.»
«Asosyasyon sa a kreye nan objektif pou enstitisyonnalize lit la, paske lit sa a pa pou mwen. Se batay tout moun ki santi yo imilye pa zak sa a. Yo non sèlman asasinen papa m, yo asasinen prezidan nou an. Yo mache sou souverènte nou. Kidonk, se batay sa a tout Ayisyen ak tout moun ki swete jwenn jistis, kèlkeswa orijin yo ak nasyonalite yo,» se Joverlein Moïse te kontinye pou l di.
Nap raple dimanch 7 jiyè a, Konsèy Prezidansyèl Tranzisyon an te òganize yon mès ki te gen pou tèm «Tan Refleksyon ak rekèyman nan memwa defen Prezidan Jovenel Moïse» nan Villa d’accueil, an prezans Premye Minis Garry Conille.
