Mouvman pwotestasyon k ap miltipliye nan Pòtoprens ak nan lòt vil nan peyi a ap sipòte pa kèk aktè ekonomik , se deklarasyon Juan Gonzalez, yon ofisyèl nan administrasyon Amerikèn nan pou Amerik Latin ak Karayib la.
Pandan plis pase yon semèn, Ayiti konnen anpil manifestasyon vyolan ak sèn piyaj nan tout peyi a. Pou Juan Gonzalez, direktè Konsèy Sekirite Nasyonal pou Emisfè Lwès la ak asistan espesyal Prezidan Joe Biden nan, se aktè ekonomik yo ki finanse mouvman nan lari a e yo ki riske pèdi lajan.
” Se moun ki souvan pa menm ap viv an Ayiti, ki gen vila nan diferan pati nan mond lan ki peye pou moun yo pran lari,” se sa Gonzalez te di jounal Miami Herald.
Nan yon entèvansyon sou France 24 nan wikenn pase a, Sekretè Jeneral Nasyonzini an, Antonio Guterres, te ale nan menm sans la. Pou li, mouvman lari yo se travay bandi ame ki enfiltre pa men ekonomik.
Bò kote pal Premye minis Ariel Henry nan yon diskou bay nasyon an dimanch pase a te li menm tou te fè konnen mouvman pwotestasyon yo se nèg ak zam ki te nan tèt yo e se pat yon koze gaz ak lamizè ki tap regle.
