Lendi 18 mas 2024 la, kèk senatè ameriken mande adminstrasyon Biden nan pou l pwolonje Program Estati Tanporè a (TPS) pou Ayisyen k ap viv nan peyi Etazini. Palmantè sa yo mande tou pou Gouvènman peyi yo a sispann depòte Ayisyen poutèt sitiyasyon sosyopolitik peyi a.
Ayiti ap konnen yon kriz politik san parèy depi kèk tan. Yon kriz ki vin agrave aprè lanmò ansyen prezidan Jovenel Moïse ak gang yo ki vin pi puisan chak jou ki kontwole 80% teritwa ayisyen an sitou kapital la. Bò kote tout kriz sa yo, peyi a depi plizyè jou lage san gouvènay. Ariel Henry dènye Premye minis ayisyen an demisyone pandan l nan peyi etranje. Sitiyasyon kawotik peyi a pa ba l chans tounen lakay li.
Se pou tout rezon sa yo, plizyè palmantè tankou Senatè Edward J. Markey (D-Mass), depite Ayanna Pressley (MA-07), Ko-Prezidan House Haïti Causus ak Yvette Clarke (NY-09) ak Sheila Cherfilus-McCormick (FL-20) antrepran demach sa. Inisyativ sa jwenn sipò 19 kolèg nan sena ki met tèt yo ansanm pou ekri yon korespondans ak egzekitif ameriken an. Daprè korespondans la, senatè yo mande Sekretè Depatman nan zafè sekirite entèn ak Depatman Leta pou l chita yon lòt fwa imedyatman sou estati proteksyon tanporè (TSP) ki pral otorize ayisyen rete nan peyi Etazini jiskaske sitiyasyon Ayiti a amelyore.
Lejislatè yo mande tou pou administrasyon Biden nan sispann pimpe ayisyen tounen lakay yo jiskaske peyi a amelyore. Daprè palmantè yo, 2 mezi sa yo enpòtan pou garanti Etazini p ap voye ayisyen tounen nan peyi yo kote pa gen yon dirijan ki ka pwoteje yo.
Carl Henry Florant
