Nan yon korespondans yo adrese ak prezidan konsèy prezidansyèl la, Edgard Leblanc Fils, Kolektif 30 janvye voye jete byen lwen desizyon ki pran konsènan dènye rezolisyon Konsèy Tranzisyon Prezidansyèl (KPT) la, estrikti sa kont lide ki adopte konsènan fason pou pran desizyon ak “présidence tournante” pou dirije konsèy la
Daprè kolektif 30 janvye a akò 3 avril 2024 ki te siyen ant pati yo pa t fè okenn referans a yon majorite kalifye ak yon “Présidence tournante”. Atik 4-1 nan Akò a di klèman: “Se youn nan manm li yo k ap kowòdone Konsèy Prezidansyèl, manm sa ap sèvi kòm Prezidan Konsèy se yo manm ki chwazi/eli daprè dokiman ki gen rapò ak òganizasyon ak operasyon Konsèy Prezidansyèl la.”
Yon lòt bò, Kolektif 30 janvye a di li rete atache ak pwosesis konsansis ki te pran nan dat 11 mas 2024 ki te mennen nan mete sou pye Konsèy Prezidansyèl Tranzisyon an, estrikti sa raple KPT se yon ògan Leta ki gouvène menm jan ak lòt yo pa lwa yo ak pwosedi administrasyon piblik ayisyen an. Kolektif 30 janvye mande pou KPT a respekte epi fè respekte kondisyon egzistans ak validite zak legal yo.
N ap raple Kolektif 30 janvye a se yon estrikti politik ki gen ladann plizyè pati tankou GREH, PHTK, LAPEH, OPL, MOPOD ak UNIR AYITI.
