Devan gwo kriz Nasyon an ap travèse, reprezantan divès sektè sa yo,politik, ekonomik, relijye ak sosyee sivil, anonse desizyon pou fòme yon Konsèy Prezidansyèl kap mennen nan tèt ansanm bak tranzisyon an pou retablisman lòd konstitisyonèl la.
Konsèy Prezidansyèl la detèmine pou soulaje soufrans pep ayisyen an ki pran nan nas move gouvènans, vyolans tout kalte, mepri sou aspirasyon l ak bezwen li yo.
Aprè enstalasyon konsèy Prezidansyèl la, l ap nonmen yon Premye Minis (fanm ou byen gason) pou fòme ak li yon nouvo gouvènman pou remete peyi an sou chimen demokrasi, estabilite ak diyite.
Konsèy Prezidansyèl la enfòme popilasyon an, dyaspora ayisyen an ak kominote entènasyonal la sou preparasyon li deja fè pou l rantre an fonksyon ofisyèlman.
Konsèy Prezidansyèl la deja elabore kritè ak mekanis sou chwa prezidan Konsèy la (fanm ou gason), sou nominasyon yon nouvo Premye minis (fanm ou Gason) ak tout kabinè ministeryèl la.
Nan tet ansanm, Konsèy Prezidansyèl la ap ekzekite yon plan pou restore lòd piblik ak demokratik a travè retablisman sekirite vi ak byen popilasyon an, soulaje mizè l, reyalize eleksyon lib ak tout lòt refòm nesesè pou pwogrè nasyon an.
Konsey Prezidansyel la ap finalize yon dokiman sou òganizasyon ak mòd operasyon li yo ki gen ladann tou yon akò politik transparan ant sektè ki enplike nan pwosesis la.
Konsey Prezidansyel la salye kouraj ak travay ajan lòd yo k ap fè respekte lalwa epi sekirize espas piblik la malgre tout defi anviwonman difisil sa a.
Peyi a nan yon kalfou enpòtan ki mande inite. Se yon obligasyon pou nou tout met tèt ansanm pou rezoud kriz la epi pou n rive tabli byennèt tout moun epi yon pi bon avni pou peyi nou an.
Se pou lespri zansèt nou yo enspire nou ak pwoteje nou. Se pou Bondye beni Ayiti! Ayibobo!
Siyatè: Leslie Voltaire, Frinel Joseph, Louis Gerald Gilles, Emmanuel Vertilaire, Fritz Alphonse Jean, Smith Augustin, Edgard Leblanc Fils, Laurent Saint-Cyr.
