Nan yon rezolisyon ki parèt vandredi 10 me 2024 la Konsèy Prezidansyèl Tranzisyon an adopte yon modèl gouvènans ki prevwa yon “Présidence tournante”. Nan menm rezolisyon sa manm KPT a deside ke tout desizyon enpòtan nan Konsèy la pral pran atravè yon majorite 5 sou 7 manm yo.
“Lè n konsidere kriz ki te deklanche anndan Konsèy la, 30 avril 2024 la, pou evite Konsèy la kraze, tout manm Konsèy Prezidansyèl Tranzisyon an ki siyen rezolisyon sa a deside ke apati 7 me 2024 jiskaske manda Konsèy Prezidansyèl la bout, tout gwo desizyon Konsèy la ap pran pa yon majorite manm ki kalifye yo, sa vle di senk (5) Konseye sou sèt (7) Konseye ki gen pou vote yo.” se sa nou li nan pwen 4 ak 4i rezolisyon sila.
Rezolisyon an souliye gwo desizyon sa yo konsène sitou chwa Premye Minis la; manm gouvènman an; manm KEP a; Direktè Jeneral; responsab enstitisyon endepandan yo; Anbasadè ak Konsil Jeneral, Konsèy Administrasyon òganizasyon otonòm yo; otorite lokal yo; kòmandan fòs piblik yo.
Pi devan nan pwen 4ii a rezolisyon an souliye apre yon konsansis manm konsèy la adopte yon “Présidence tournante” ki aplikab pou kandida ki te nan kous nan eleksyon prezidansyèl 30 avril 2024 la, premye ladan yo se pral Edgard Leblanc Fils (soti 7 me rive 7 oktòb 2024), dezyèm Smith Augustin (soti 7 oktòb 2024 pou rive 7 mas 2025), twazyèm Leslie Voltaire (soti 7 mas 2025 pou rive 7 out 2025), katriyèm Louis Gérald Gilles (soti 7 out 2025 pou rive 7 fevriye 2026). “Présidence tournante” la kòmanse apati 7 me 2024.
