Nan yon nòt ki parèt lendi 13 me 2024 la, Konsèy Prezidansyèl Tranzisyon an anonse se avèk lapenn yo aprann bandi ak zam kontinye ap simen latwoublay nan plizyè zòn, KPT a voye pinga bay endividi san fwa ni lwa k ap mete dlo nan je popilasyon an.
“Pèp Ayisyen, se ak anpil endiyasyon Konsèy Prezidansyèl Tranzisyon an aprann bandi ak zam yo kontinye ap simen latwoublay nan peyi a. Nan jounen samdi ki te 11 me 2024 la, kriminèl yo rantre nan komisarya Gresye a ak lakay youn nan responsab lapolis yo epi fe vyolans mete dife, plizyè sitwayen nan popilasyon sivil la viktim. Zak sa a temwaye yon lot fwa ankò, pi gwo ijans ki genyen la a se derasinen banditis la nan peyi a, kidonk sekirite.” se sa nou li nan kòmansman nòt la.
Konsèy Prezidansyèl Tranzisyon an pwofite tou pou voye fòs ak kouraj bay tout polisye yo ki rete atache ak prensip lapolis la malgre sitiyasyon difisil yo. KPT a pa neglije voye senpati bay tout moun ki viktim nan zak kriminèl yo nan Gresye ak tout lòt kote nan peyi a. Konsèy la voye di sila ki viktim yo li la pou bay repons.
Pi lwen, KPT Edgard Leblanc Fils ap dirije a fè konnen li klè gen gwo panik nan kan bandi yo paske farin nan pap vin nan menm sak. “Konsèy Prezidansyèl Tranzisyon an bay popilasyon an garanti nan yon tan ki pa long bandi pra 1 sispann fè lalwa sou kò yo, nan kay yo, nan katye yo, nan vil yo ak nan peyi a,” daprè konsèy la.
Pou fini KPT a mande manm popilasyon an pou I pa pran nan okenn divèsyon, pwovokasyon ak konfizyon moun k ap fè zak kont yo depi lontan ap simaye sou rezo yo. Li mande pèp la kolabore ak tout fòs lòd yo paske batay kont ensekirite a se batay tout moun ki pa bandi epi ki pa p sipòte bandi.
