Lame Ameriken fè konnen Madi 7 me a li kòmanse deplwaye an Ayiti premye materyèl nesesè yo pou prepare rive fòs miltinasyonal la sou sòl papa Desalin nan.
“Kòmandman Sid lame Amerikèn kowòdone plizyè vòl avyon militè ameriken ki pote pèsonèl sivil yo, ekipman ak founiti yo nan ayewopò entènasyonal Toussaint Louverture nan Pòtoprens”, daprè yon nòt pou laprès.
Daprè yon sous jounal kanadyen LA PRESSE site pèsonèl sa yo pral travay ansanm ak responsab yo nan ayewopò a pou sekirize ekipman ak founiti ki deja rive anndan peyi a.
Daprè sa jounal la ekri lame amerikèn fè konnen misyon sa a rive posib gras ak kowòdinasyon ak sipò enstans ayisyen ki konsène yo k ap travay pou kenbe ayewopò a louvri epi kontinye pou avyon militè yo ka kontinye debake.
Materyèl sa yo k ap rantre chak jou se pou prepare rive fòs sekirite miltinasyonal ke Kenya pral gen pou dirije, daprè plizyè eleman enfòmasyon yo fòs miltinasyonal la ta dwe kòmanse rive anndan peyi a fen me k ap vini la.
Selon enfomasyon Nouvelis rapòte gen plis pase 100 vòl militè ameriken ayopò Tousen louvèti ap gen pou resevwa nan jou kap vini yo toujou nan demach preparasyon MMS la.
