Nan nwit 13 pou louvri 14 fevriye 2024, lapolis nan vil Kap Ayisyen sezi 78 pakè (192.5 kilo) pwodwi ki sanble ak Marijuana ki tap transpòte nan yon machin Van Honda koulè gri.
Byen ta nan lannwit la, patwouy komisè Polis Kap Ayisyen an (Mackendy Jean Noel) tap siyonnen zòn Fort St Michel ( tou pre lopital la) lè yo te remake yon tranzaksyon sispèk kap fèt bò lanmè a.
Lè sispek yo wè lapolis yo kouri. Chofè a bò kote pa l lage machin nan ak tout dwòg la nan lanmè. Lapolis rele “Gardes Cotes” ki te vini pote ranfò.
Fòs lòd yo arete Mitchell Winston Evan, 47 lane, yon sitwayen Jamayiken ki ta sanble se mèt dròg la, ak yon lòt endividi ki te akonpaye l.
Apre konsta jij depè seksyon Sid Kap Ayisyen, BLTS pran dosye a pou lòt swivi.
