Reprezantan Ayiti nan Òganizasyon Leta Ameriken yo (OEA; sig ki nan lang fransè a), Léon Charles demisyone nan pòs li daprè yon korespondans li adrese bay Minis zafè etranjè peyi Dayiti a, Jean Victor Généus. Yon desizyon ki vini aprè non ansyen DG PNH la parèt nan òdonans jij enstriksyon Walter Wesser Voltaire nan kad dosye lanmò ansyen prezidan Jovenel Moïse.
Ansyen Direktè Jeneral Lapolis la sou Prezidan Jovenel Moïse la fè konnen li pran desizyon sa n ap site pou “Konbat ak fòs li nan kèlkeswa mwayen legal, akizasyon fantezi k ap peze sou dò l epi pou l ka lave imaj li tou.”
Léon Charles nan korespondans sa presize li pa resevwa òdonans la. Men li chwazi demisyone pou l kapab jere dosye sa kote non l ekri nwa sou blan nan òdonans jij Walter Wesser Voltaire k ap mennen ankèt sou lanmò Jovenel. Ansyen anbasadè Ayiti nan OEA jije òdonans la enjis epi l denigre repitasyon l.
N ap raple, daprè enfòmasyon ki pibliye nan kad ankèt sou lanmò ansyen chèf Leta ayisyen an, Jovenel Moïse, prezidan an te rele ansyen Direktè Lapolis nasyonal la nan lannuit krim nan. Men li pa t pote l sekou.
Carl Henry Florant
