Ansyen Premye Minis ayisyen an Claude Joseph sou yon lis 12 moun ki entèdi antre nan Repiblik Dominikèn, daprè yon desizyon prezidan dominiken an, Luis Abinader, te adopte nan aswè mèkredi 7 septanm nan.
Desizyon sa, chèf lEta Dominiken an te voye l bay Venancio Alcántara Valdez, ki se Direktè Jeneral Imigrasyon, epi ki te sipòte pa Lwa 285-04 nan zafè Imigrasyon ak règleman aplikasyon li yo, ki anpeche antre sou teritwa nasyonal la etranje ki gen yon dosye kriminèl oswa ki nan opinyon otorite konpetan yo parèt yon menas kont sekirite nasyonal ak enterè Repiblik Dominikèn.
Claude Joseph, Jimmy Cherizier alyas Babekyou, Innocent Vitel’Homme, Destina Renel alyas Ti Lapli, Wilson Joseph alyas Lanmo San Jou, Claudy Célestin ( Chen Mechan), Alexandre Ezechiel alyas Ze, Kempes Sanon, Chery Christ-Roi, ki gen non Chris-La, Félix Monel alyas Micanor, Jean Pierre Gabriel(Ti Gabriel), Alexis Serge Renel (Ti Junior) epi Orlichen Emile alyas Pè Lebren. Se non Ayisyen sa yo ke prezidan Abinader entèdi pou pa met pye yo nan peyi Repiblik Dominikèn.
Ansyen Premye minis Ayisyen an, Claude Joseph pat pran tan poul te reaji sou desizyon sila.”Prezidan Luis Abinader entedi m rantre an Repiblik dominikèn. Li klase m kòm lènmi nimewo 1 rasis dominiken yo. Se pa yon sanksyon. Se yon onè. Mwen resevwa l nan non papa Desalin, Tousen ak Kristòf. Nap kontinye goumen pou konstwi peyi a nan dimansyon istwa l.” se sa ansyen chef gouvènman fè konnen. Fòk nou raple pandan plizyè fwa, Claude Joseph eksprime klèman opozisyon li ak politik prezidan dominiken an sitou nan relasyon ant de peyi yo.
