Nan yon kominike ki pibliye prèske 24 èd tan aprè match fas Irigwey la, Federasyon Brezilyèn Foutbòl la (CBF) fè konnen Neymar Da Silva Junior ki gen 31 lane blese nan ligaman kwaze anteryè ak menisk jenou goch li, sa ki lakoz atakan klèb Al-Hilal lan ap absan pou plizyè mwa.
Definitivman malediksyon blese a ap pouswiv Neymar. Alòske l te opere nan cheviy dwat li nan mwa mas pase a, jwè Brezilyen an retounen blese ankò, fwa sa se nan ligman kwaze anteryè ak menisk jenou goch li, ansyen jwè Paris Saint Germain an te viktim blese sa avan fen premye mitan match ki te mete fas pou fas ekip Irigwey la ak Brezil nan eliminatwa pou mondyal 2026 la.
Daprè kominike responsab yo nan CBF la, ansyen jwè FC Barcelone nan ap gen pou l opere, men poko gen dat ki presize pou operasyon jwè a. Plizyè medya fè konnen gen posibilite pou l pa monte teren pandan anviwon 7 a 9 mwa, posibilite tou poul pa jwe Copa America kap fèt nan peyi Etazini jen 2024.
Nap raple, apre 6 sezon li te pase anndan ekip PSG a, Neymar te rejwenn klèb Sawoudyen Al-Hilal pou 90 milyon Ewo. Avèk ekip sa Neymar gentan jwe sèlman 5 match nan tout konpetisyon yo pou sezon sa, li enskri yon grenn gòl epi li bay 3 pas gòl.
