Nan yon nòt pou laprès ki parèt 2 me 2024 la
Ministè Edikasyon Nasyonal ak Fòmasyon Pwofesyonèl (MENFP) pran yon desizyon enpòtan apre yon ensidan malonèt yon direktè lekòl Fò Libète kont yon elèv.
MENF a sispann lisans pou dirije ak ansèyman direktè lekòl nasyonal Bethel Bethesda, Anebert Joseph. Mezi sa a vini aprè direktè a te maspinen yon elèv nan lekòl la 22 avril 2024 la paske l te pran lwa, jan Direksyon Depatmantal Nòdès la konfime sa.
Ministè a te pran desizyon sa a aprè li te resevwa yon rapò ki bay detay sou gravite vyolans ki te fèt sou elèv sa a.
Konpòtman direktè lekòl la non sèlman vyole prensip edikasyon yo, men tou vyole règleman legal ki entèdi pinisyon kòporèl nan etablisman edikasyon. Anplis sispansyon lisans li yo, ministè a ap pran lòt mezi administratif aprè yon ankèt apwofondi Enspeksyon Jeneral Edikasyon.
Anplis de sa, Ministè a ap asire l elèv ki viktim nan resevwa sipò sikolojik ki nesesè pou soulaje domaj ensidan sa lakoz.
