An jeneral, Dyaspora a se yon fenomèn jewopolitik ki defini kòm dispèsyon espasyal yon kominote. Tradisyonèlman li prezante kòm yon pèt nasyonal nan resous imèn, li poutan konstitye yon avantaj pou peyi ki resevwa kominote sila. Pafwa li difisil pou komite sa gen konesans dwa yo nan peyi etranje. Nan sans sa, Me Béatrice Cazeau yon renome avoka Amerikèn ki gen orijin li an Ayiti pote ekspètiz li chak semèn bay kominote Ayisyèn nan peyi Etazini yon fason pou ede yon konnen dwa yo a travè yon emisyon ki gen ti nom li koze legal.
«Mwen se Béatrice Cazeau, yon pwofesyonèl Ayisyèn, yon avoka depi plis pase 20 lanne. Mwen fèt an Ayiti, mwen kite peyi a lè mwen te gen 12 zan poum te rantre New York. Mwen fè kolèj nan vil sa apre mwen te kitel poum tal fè etid dwa nan lakou Boston. Aprè etid mwen m tal viv Florida kotem tap travay kòm komisè gouvènman, mwen pase 3 zan la e aprè mwen louvri ofis prive mwen ak yon patnè. Depi 2002 jiska jodia mwen ap travay nan kabinè prive mwen kote mwen resevwa kliyan pou plizyè tip dosye. Mwen se tou ansyen prezidant asosiyasyon avoka Ayisyen yo.» se te premye mo Mèt Beatrice Cazeau nan yon konvèzasyon Tele PAM te gen ak li.
Nan peyi Etazini menm jan ak tout lòt peyi ki gen kominote Ayisyèn ap viv, li difisil pou Ayisyen adapte yo ak sistèm jiridik peyi a, Mèt Beatrice pwopoze sila kap viv nan peyi Tonton Sam yo, yon emisyon ki pase chak lendi yon fason pou ede yo konnen tout dwa ak devwa yo. « Pandan epòk Kowonaviris la, kote tout moun te oblije rete lakay yo, nan moman sa nou te vle pote kèk enfòmasyon ki kapab ede kominote Ayisyèn nan. Epi nou deside lanse emisyon Koze Legal kap pèmèt Ayisyen nan Etazini fonksyone nan peyi a.»
Koze Legal se emisyon sa pase chak semèn sou rezo sosyal yo , ki vize eklere,responsabilize ak edike kominote ayisyen-ameriken an sou sijè legal enpòtan ak evènman aktyèl yo. Chak semèn yon pèsonalite envite pou diskite sou pwoblèm ijan kominote Ayisyèn nan Etazini an ap fè fas.
«Objektij emisyon an se bay kominote Ayisyèn nan diaspora kèk enfòmasyon, paske anpil nan ayisyen kap viv Etazini gen enfòmasyon enpòtan yo pa konnen, espesyalman nan dosye legal yo. Gen anpil dwa ak devwa yo genyen men yo pa konnen yo, nan sans sa nou deside pote chak semèn yon pakèt enfòmasyon kap itil yo nan vil nòmal. Lèw bezwen yon pèp avanse fòk ou ka edel nan edel konn tout sa ki enpòtan sou dwa ak devwal,» konkli Mèt Beatrice Cazeau.
JKC
