Yon nouvo karavan migran kite lakou peyi Meksik pou pran direksyon tè pwomès la, Etazini, jou ki te dimanch 24 desanm 2023.
Daprè enfòmasyon BBC rapòte, se anviwon sèt mil (7 000), RFI bò kote pal pale de 8000 migran, majorite nan yo soti nan Amerik Sid ak Amerik Santral la, ki kite vil Tapachula nan Sid peyi Meksik pou mete tèt yo pou peyi Etazini.
Kèk jou avan reyinyon bilateral ant prezidan meksiken an, Andrés Manuel López Obrador ak sekretè Leta ameriken an, Antony Blinken, sekretè sekirite nasyonal Alejandro Mayorkas ak konseyè sekirite nasyonal Mezon Blanch, Liz Sherwood Randall la ki dwe reyalize 27 desanm nan, plizyè milye migran kontinye pran wout Meksik pou ale Etazini. Migran sa yo ki ap fè fas ak lamizè tout kalte ak ensekirite nan peyi yo deside ak tout fòs yo rantre nan lakou blan meriken yo. Yo pwofite fèt Nwèl la pou yo pran wout Meksik pou ale Etazini.
Moun sa yo ki konpoze ant 24 nasyonalite pami yo Ayisyen, kiben, Ondiryen, Venezyelyen dakò pou yo fè plizyè wout tèt chaje pou yo ale nan pey Tonton Sam. Yo pase nan plizyè vil, genyen ki menm konn mouri. Tankou, daprè medya Meksiken yo, jedi pase a, de (2) migran mouri nwaye nan rivyè ki sou fwontyè Meksik-Etazini an pandan y ap tante travèse l. Endividi sa yo t al pase nan yo. pati nan rivyè a ki chaje ak labou epi fatra tou.
Fas ak plizyè milye migran k ap soti peyi Meksik anvayi fwontyè Etazini an, Mezon Blanch deklare li debòde. Se pase 10 000 pasaj ki fèt dènye semèn sa yo daprè lapolis fwontalyè yo. Malgre yo fèmen plizyè pwen pasaj tankou nan Texas, Arizona ak Californie, polisye yo fè konnen yo dwe ranfòse efektif yo nan sant anrejistreman.
Carl Henry Florant
