Polisye kenyan ki gen pou deplwaye an Ayiti pou misyon sipò sekirite miltinasyonal (MMAS) boukle fòmasyon yo, daprè sa medya kenyan The Star fè konnen mèkredi 17 janvye 2024 la.
Daprè jounal The Star, ekip ki soti nan Inite Deplwaman Rapid, Inite Anti-Vòl, Inite Sèvis Jeneral ak Inite Patwouy Fwontyè te konplete fòmasyon yo nan dat 4 janvye pase a.
Pi lwen The Star fè konnen responsab yo mansyone ekip la resevwa enstriksyon pou pran yon ti repo pandan y ap tann desizyon lakou siprèm peyi Kenya sou deplwaman fòs la sou sòl Dessalines nan. Yon ofisyèl, ki pat vle non l site te pale ak The Star, te di: “Kounye a ekip la pare pou deplwaman apre fòmasyon solid yo.”
Nap raple tou ekip la pral sèvi ak inifòm vèt Inite Sèvis Jeneral la kòm rad ofisyèl konba pandan misyon li an Ayiti. Kenya ap pran tèt operasyon yo kap enplike anviwon 3,000 pèsonèl.
Ekip la ap ekipe tou ak fizi AK-47 kòm zam prensipal, epi ofisye yo pral ansanm ak pèsonèl ki soti nan peyi ki konfime deplwaman ekip yo an Ayiti, tankou Chili, Jamayik, Grenad, Paragwe, Burundi, Tchad, Nijerya ak Moris, toujou daprè The Star.
Nap raple nan mwa novanm pase a, jij Tribinal Chacha Mwita te anonse yo ap deside sou dosye konsènan deplwaman nan dat 26 janvye 2024 la.
