Nan kat (4) premye mwa lane 2024 la Repiblik Dominikèn depòte plis pase 200 timoun ki pa akonpaye ak paran yo. Yon sitiyasyon mangonmen ki pouse responsab Fondasyon “Zanmi Timoun” yo leve vwa an favè timoun sa yo.
Fondasyon “Zanmi Timoun” denonse ak tout fòs li konpòtman otorite yo nan peyi vwazen an, ki pandan kat premye mwa ane 2024 sa a depòte plis pase 200 timoun nan pwen fwontyè Belladère/Elias Pinas san akonpayman moun oubyen paran yo.
“Depi kote otorite migrasyon dominiken yo pran yo a jiskaske yo depòte yo an Ayiti, timoun sa yo soufri menm tretman ak granmoun yo, tankou vyolans fizik. Fanm ak tifi yo sibi asèlman ak/oswa vyòl. Nou ta dwe remake aktè yo limite nan repons ki dwe bay nan sitiyasyon difisil sa a, akoz sitiyasyon sekirite nan peyi a,” se sa òganizasyon an fè konnen.
Fondasyon “Zanmi Timoun” mande otorite konsène yo pou yo fè devwa yo epi pou yo voye je yo sou timoun sa yo ki te depòte san paran yo. Dwa timoun sa yo vyole, kontrèman ak dispozisyon konvansyon entènasyonal sou dwa timoun ki ratifye pa Leta Dominiken ak Leta Ayisyen. Otorite konsène yo dwe pran mezi pou pwoteje enterè timoun imigran vilnerab yo,” daprè fondasyon an.
