Federasyon foutbòl Almay la anonse nouvèl lanmò youn nan pi gwo jwè alman, Franz Beckenbauer jodi lendi 8 janvye 2024 la. Lejand alman ki ranpòte de (2) balon dò nan lane 1972 ak nan lane 1976 la mouri nan laj 78 lane.
Yon nyaj sonb kouvri syèl mond foutbòl la. Aprè lanmò ansyen foutbolè brezilyen an Mario Zagallo vandredi 5 janvye pase a, yon lejand alman pati kite n. Franz Beckenbauer, ansyen vedèt ekip Almay la mouri nan laj 78 lane, daprè Federasyon foutbòl Almay la ki anonse nouvèl lanmò a, jodi lendi 8 janvye 2024 la.
Defansè lejandè alman yo te bay ti non Kaiser, gen yon karyè entèresan ni kòm jwè ak ni kòm seleksyonè ekip Almay foutbòl maskilen an. Kapitèn anblematik ekip Almay ranpòte Chanpyona Ewopeyen nan lane 1972. Li ranpòte tou Koup di mond 1974 la ak ekip Almay kòm jwè foutbòl.
Aprè l fin mete yon bout nan karyè foutbòl li, Franz vin antrenè seleksyon Almay la. Nan lane 1990, Franz Beckenbauer ranpòte Koupdimond la ak ekip Almay la. Franz pami twa (3) sèl defansè ki ranpòte balon dò nan karyè foutbòl yo. Li te pran yo nan lane 1974 ak nan lane 1976.
N ap raple, mond foutbòl la konsidere Franz Beckenbauer ak Paolo Maldini, Franco Baresi, Bobby Moore kòm kat (4) pi gwo defansè istwa foutbòl la.
Carl Henry Florant
