Depi anviwon yon semèn Polis nasyonal Dayiti a angaje l nan yon batay ak gang yo ki anvayi Gresye. Dimanche 19 me 2024 la, nan kad operasyon yo lapolis anonse genyen plizyè bandi ak zam nan boukante kout bal ak PNH la ki tonbe nan zòn sa.
Enstitisyon an fè konnen tou genyen plizyè zam gwo kalib ak telefòn yo sezi. Pi devan lapolis raple kolaborasyon popilasyon an enpòtan anpil nan batay k ap mennen kont gwoup ak zam k ap feraye nan kapital la ak zòn metwopolitèn Pòtoprens lan.
N ap raple bandi semèn pase a bandi san fwa ni lwa te atake komisarya Gresye, yo piye epi boule kay malere sa ki te lakoz plizyè santèn moun nan popilasyon zòn sa te kouri kite kay yo al pran refij lòt kote. Apre anpil jefò fòs lòd te rive repran kontwòl komisarya.
