Komemorasyon 221yèm anivèsè kreyasyon drapo a te fèt nan Villa D’accueil, sou tèm: Ann rasanble anba drapo n. Seremoni sa a te rasanble manm gouvènman demisyonè a, manm administrasyon piblik la, manm kò diplomatik la, ofisyèl inivèsite a. Se sèlman kat nan nèf manm KPT yo, Leslie Voltaire, Louis Gérald Gilles, Frinel Joseph ak Edgard Leblanc Fils, ki te patisipe nan seremoni sa, lòt yo te pran direksyon Kap Ayisyen.
Prezidan Konsèy prezidansyèl tranzisyon an pwofite seremoni selebrasyon samdi sa pou l anonse avan lontan retablisman otorite Leta a ak retabli klima sekirite ki favorab pou retounen nan lavi nòmal an Ayiti.
Edgard Leblanc Fils, ki te pale nan non konsèy Tranzisyon prezidansyèl la, montre nesesite pou egzekitif la travay pou respekte senbòl bikolò ayisyen an. “Inyon n ap klewonnen an rete nan diskou sèlman. Nou bezwen yon nouvo depa,” se sa l te di nan diskou a.
“Fèt drapo a dwe fè nou sonje tou pa gen teritwa ki pèdi. Chak mèt nan teritwa nou an se posesyon Leta ayisyen,avan lontan drapo ble ak wouj la ap flote sou tout teritwa a ,yon fason pou raplen ensekirite a fini”, se sa prezidan KPT a deklare, kòm yon repons ak Minis enterimè Jistis ak Sekirite Piblik la, Emmelie Prophète Milcé, ki te prezan nan seremoni an. Pou rapèl Emmelie te pale de teritwa pèdi nan yon emisyon ak jounalis Yvenert. Nan moman prezidan KPT a tap fè diskou sa a,Emelie Prophete pat lwen li, ti sekans videyo sa viral sou rezo yo.
Yon lòtbò, alòske 17 me a te jounen nasyonal anseyan yo, prezidan konsèy la te pwofite wete chapo ba devan pèsonèl edikatif yo ki devwe pou bay moso ledikasyon nan yon kontèks difisil.
